Programa batok sa panigarilyo, ipatuman sa Agusan Norte
DAKBAYAN SA BUTUAN -- Ipatuman na ang healthy settings program nga nagtinguha nga mahimong smoke and vape-free ang probinsya sa Agusan del Norte.
Kini ang unod sa Memorandum of Understanding (MOU) nga pagapirmahanan ni Gob. Ma. Angelica Rosedell M. Amante tali sa Department of Health – Center for Health Development (DOH-CHD) Caraga.
Pinaagi sa maong programa, magtinabangay ang duha ka partido sa pagplano, pagpatuman ug pagmonitor sa mga aktibidad batok sa panigarilyo ug paggamit sa vape.
Ang mga lokal nga opisyal maghimo og mga lakang aron matabangan ang komunidad nga malikayan ang kadaot sa panigarilyo ug vaping. Apil sa ilang tahas ang pagsuporta sa mga health program, paghatag og edukasyon ug pagmonitor sa kalampusan sa program.
Kini nga lakang usa ka dako og tabang sa pagpanalipod sa panglawas sa katawhan ug paglikay sa risgo sa paggamit sa sigarilyo ug vape, labi na sa kabatan-onan.
Ang paghatag otoridad sa pagpirma sa MOU gi-aprobahan pinaagi sa Sanggunian Resolution No. 170-2025 sa pagpangamahan ni Board Member James T. Reserva, tsirman sa Comittee on Health and Nutrition. (PLGU Agusan del Norte/PIA Agusan del Norte)
