Caraga Regional Hospital Annex sa Basilisa, nagpahigayon og dry run operation
BASILISA, Dinagat Islands — Personal nga gituyo ni Security Officer IV Niel Edward M. Demerey isip representante ni Gobernador Nilo P. Demerey, Jr., MPM ang Caraga Regional Hospital Annex (CRHA ) isip Bagong Urgent Care And Ambulatory Services (BUCAS) facility sa probinsya sa Dinagat Islands nga nagpahigayon sa ilang dry run operation niadtong Disyembre 17 ngadto sa munisipyo sa Basilisa, ning probinsya.
Nagsugod na usab sila og dawat sa mga pasyente apan, tungod kay dry run pa kini, ang mga pasyente nga nanginahanglan og mas komplikadong serbisyo o espesyalidad ipasa gihapon ngadto sa mas dagkong ospital. Ang dry run molungtad hangtod Disyembre 19, 2024. Kini nga lakang kabahin sa ilang pagpangandam alang sa full operation aron masiguro nga andam na ang tanang pasilidad, kagamitan, ug mga kawani sa pag-atubang sa mga medikal nga panginahanglan sa komunidad.
Dugang pa, anaa na ang Remedy Aksyon Center table sulod sa ospital aron maghatag og dugang nga assistance sa mga pasyente nga magkinahanglan niini. Naghatag kini og suporta, lakip na ang pagpatabang sa pag-refer sa pasyente ngadto sa uban nga ospital kon kinahanglan.
Sa pikas bahin, personal usab nga gibisita ni Atty. Demerey kauban sa mga personahe sa CRHA ang unang pasyente nga niadto sa maong hospital aron kini kamustahon.
Ang CRHA , sa pakiguban sa provincial government sa Dinagat Islands sa pagpangulo ni Gov. Demerey , nagpadayon sa maong misyon sa pagtubag sa medikal nga panginahanglan sa mga Dinagatnon nga adunay dakong katabang ilabina sa mga emerhensiyang kaso.
Ang pondo sa CRHA o BUCAS facility nga nagamit sa Phase 1 mao ang P50 milyon, samtang ang P75 milyon mao ang gigasto alang sa Phase 2 nga giikan kini nga pondo sa Health Facilities Enhancement Program (HFEP). (Governor Nilo P. Demerey Jr./PIA-Dinagat Islands)
