Nagkalain-laing sektor sa Dinagat Islands, midawat og livelihood assistance
DINAGAT ISLANDS -- Agi'g pagkunhod sa kapobrehon nga nasinati sa probinsya isip pinaka-dakong problema sa nasod, usa ang panghatag og livelihood Assistance sa namahimong lakang sa Provincial Government sa Dinagat Islands ubos sa pagdumala ni Governor Nilo P. Demerey Jr., MPM sa programang Remedy for Livelihood pinaagi sa paningkamot sa buhatan sa Provincial Public Employment Service Office (PPESO) sa pagpanguna ni PPES Officer-Designate Lucia Galabo ug sa pakig-alayon sa Provincial Cooperative Development Office (PCDO) sa pagpanguna ni PCD Officer Alvin Dela Cruz, Provincial Population Office (PPO) sa pagpanguna ni Provincial Population Officer Lucio Mercado ug sa mga municipal PESO managers sa matag munisipyo.
Nagmalampuson nga gitunol ngadto sa 75 ka mga benepisyaryo gikan sa nagkalain-laing sektor sa matag munisipyo sa probinsya sama sa mga loggers, overseas Filipino workers (OFW), ug microentreprenuers nga nakadawat og P10,000 ug sa teen mothers nga nakadawat ug P5,000 matag usa kanila pinaagi sa livelihood assistance payout nga gipahigayon ngadto sa Provincial Public Employment Service Office (PPESO), Capitol compound, Cuarinta, San Jose, Dinagat Islands.
Tumong niini nga mahatagan sila og gamay nga kapital alang sa pagsugod og negosyo nga makatabang sa ilang pamilya ug mabawasan ang poverty rate sa probinsya. Sigon pa ni Gov. Demerey nga ang solusyon sa kapobrehon mao ang pagpanarbaho diin pinaagi sa livelihood assistance nga ilang nadawat mas palambuon pa nila ilang pagpanginabuhi ug hinaot nga dili masayang ang gihatag nga tabang sa gobyerno, hatagan unta nila kini og bili o importansya lakip ang paglikay sa mga illegal nga buhat. (PIO PDI/PIA-Dinagat Islands)
