USAD farmer gibisita sa mga opisyales sa Agusan Sur
PROBINSIYA SA AGUSAN DEL SUR -- Gibisita sa mga opisyales sa probinsiya sa Agusan del Sur ug sa munisipyo sa Veruela ang usa ka Upland Sustainable Agri-forestry Development (USAD) program farmer-enrollee nga si Ernesto Alambatin kinsa adunay tanom nga cacao sa iyang usa ka ektaryang luna sa Barangay Limot sa maong lungsod.
Ang maong aktibidad gipangunahan ni Governor Santiago Cane Jr. kauban si Congressional Chief of Staff Patricia Anne Plaza, mga Sangguniang Panlalawigan (SP) members ug Philippine Councilors’ League President Salimar Mondejar.
Nakita sa mibisita nga grupo ang resulta sa tabang sa gobyerno ug sa kakugi ni Alambitin tungod sa maayo nga abot sa iyang uma nga nakahatag og dakong tabang sa iyang panginabuhian.
Si Alambitin nahimo nga enrollee sa USAD niadtong tuig 2015 ug siya mitanom og 625 ka punoan sa cacao ug gisuportahan kini sa probinsiya sa iyang panginahanglanon.
Sa tuig 2018, nagsugod si Alambitin sa pag-harvest sa iyang cacao nga motimbang sa kapin sa 200 kilos matag season hangtod sa kasamtangan.
“Dako gyud kaayo og tabang sa amo ang programa sa USAD kay tungod niini, aduna na kami klarong panginabuhian nga nakapauswag sa kahimtang sa among kinabuhi,” butyag ni Alambitin. (Ronald Notarion, PPIO-PAMRE/PPIO-Agusan del Sur/PIA-Agusan del Sur)
