Pagsaulog sa ika-124 nga anibersaryo sa Civil Service, gisugdan sa Las Nieves
LAS NIEVES, Agusan del Norte -- Gipahigayon ang opening ceremony alang sa ika-124 nga anibersaryo sa Civil Service sa Munisipyo sa Las Nieves, Agusan del Norte human sa weekly flag ceremony sa municipal grounds, Poblacion.
Ang kasaulogan pinasubay sa Presidential Proclamation No. 1050, series of 1997 nga nagdeklara sa bulan sa Septyembre isip Civil Service Month. Gipangunahan kini sa Civil Service Commission (CSC) ubos sa tema, "Transforming Public Service in the Next Decade: Honing Agile and Future-Ready Servant-Heroes."
Ang maong tema nagpadayag sa pagkamadasigon sa mga empleyado sa gobyerno taliwala sa pandemya ug ang pagdayon nga paghatag sa hataas nga kalidad sa serbisyo pamaagi sa mga bag-ong teknolohiya.
Sa mensahe ni Mayor Karen S. Rosales, iyang gidasig ang mga empleyado sa panggamhanan nga magpadayon sa pagpangalagad sa katawhan bisan man sa gawas na sa ilang buhatan.
“Isip public servants, ang atong serbisyo dili lamang taman sa sulod sa opisina, dapat bisan naa na kita sa gawas andam gihapon kita mualagad sa katawhan,” ang pahayag ni Mayor Rosales.
Lakip sa seremonya ang usa ka banner raising activity diin naglumba ang matag buhatan sa LGU sa pagtaod ug pag bandera sa ilang tagsa-tagsa ka mga banners.
Misalmot usab sa aktibidad ang mga personahe sa Municipal Police Station ubos sa pagpanguna ni PCapt. Charlon M Montero; ug Bureau of Fire Protection pinangulohan ni SFO4 Arniel P Goloran.
Gi-anunsyo usab atol sa aktibidad ang mga paaboton nga mga aktibidad mahitungod sa maong kasaulugan sulod sa bulan sa Septyembre 2024. (MLGU-Las Nieves/PIA-Agusan del Norte)
