Agsurnon misalmot sa business education seminar
AGUSAN DEL SUR -- Gipahigayon sa Department of Trade and Industry (DTI) sa Agusan del Sur ang usa ka business education seminar sa mga negosyante sa lungsod sa Talacogon, Agusan del Sur kaniadtong Abril 5. Ang aktibidad aktibong gitambongan sa kapin 30 ka mga tag-iya ug tagdumala sa mga drygoods, hardware, fish/meat vendors, ug tahay processors sa maong lungsod.
Pinaagi sa Negosyo Center Talacogon, tumong sa maong aktibidad ang paghatag og kadasig ug dugang kaalam sa pagnegosyo. Gihisutan ni Generoso Bulaquiña, Negosyo Center-Talacogon business counselor, ang bag-ong pamaagi sa pagkuha og DTI business name registration certificate sa online, diin dili na kinahanglan pang muadto sa opisina ang mga negosyante.
Sa maong seminar, gipresentar usab sa DTI ang mahitungod sa product standards diin gihatagan og importansya ang pagpamaligya og mga nagkadaiya nga produkto nga gikinahanglan moagi sa mandatory certification gikan sa DTI aron makabaton og sakto nga labels ug markings sa dili pa kini mabaligya.
Gipasabot usab ang Price Tag Law aron masubay ang sakto nga pamaagi sa pagbutang og presyo sa mga produkto. Sa katapusan, gipa-ambit usab sa DTI ang importansya sa pagkuha ug sales promotion permit. Ang maong mga hisgutanan subay sa balaod basi sa Republic Act No. 7394 o Consumer Act of the Philippines.
Mipahigayon usab ang LGU - Talacogon og business permit registration pinaagi sa ilang designated Business Processing and Licensing Officer (BPLO) nga si Robert B. Nuer.
Nahisgutan sa maong topiko ang mga panginahanglanon ug kwentada sa paglukat og business permit. Nahimo usab nga interesante ang mga negosyante sa pagpadayag sa ilang mga mulo ug kalibog sa pagnegosyo, samtang sila lagsik nga gipasabot ni Nuer. (DTI AgSur/PIA-Agusan del Sur)
