Liderato sa Agusan Sur suporta ang negosyo sa wooden utensils
AGUSAN DEL SUR -- Ang pagbisita sa Team Eddiebong gipresentahan ni Governor Santiago Cane, Jr. ug Vice Governor Samuel Tortor sa Leah's Wooden Products sa Barangay Buena Gracia, Talacogon usa ka makahulugan nga panghitabo sa lokal nga ekonomiya.
Sa ilang pagbisita, nahatagan ang negosyo sa pamilya ni Leah Mondejar og mas lapad nga perspektibo ug hayag nga kaugmaon nga mapalambo pa ang pagpanghimo ug binulto nga popsicle stick, coffee stirrer, ice cream spoon, kutsara ug tinidor nga ginama mismo sa kahoy nga Falcata.
Dakong tabang usab kini sa mga lumulupyo sa maong lugar kay naka-generate kini ug trabaho sa mga residente.
Ang gobernador ug bise gobernador wala lamang nagpakita og interes sa pagtabang apan daghan pa kining gihatag nga mga ideya alang sa malungtaron nga pag-negosyo. Gipahibalo nila ang ilang pagsuporta sa mga proyekto ug programa nga mahimong makatabang sa pagpalambo sa industriya ug paglambo sa ekonomiya sa lalawigan sa Agusan del Sur.
Positibo ang mga opisyales sa ilang suporta sa maong negosyo kalabot na usab kini sa pagdili sa paggamit sa single-use plastics nga nakalatid sa Republic Act No. 9003 o ang Ecological Solid Waste Management Act of 2000 ug sa memorandum circular nga gi-issue ni Gov. Cane niadto pang tuig 2019.
Dugang pa, ang pagbisita sa mga opisyales kauban ang mga personahe sa Department of Science and Technology (DOST) Caraga nga gipangunahan ni Regional Director Noel M. Ajoc ug Engr. Andrea J. Cabonita, Department of Trade and Industry (DTI) nga gipangunahan sa officer-in-charge - Provincial Director Marson Jan S. Dolendo ug ang lokal nga panggamhanan sa Talacogon ubos sa liderato ni Mayor Pauline Marie R. Masendo, nagpakita sa maayong relasyon ug kooperasyon tali sa lokal nga pamunuan ug sa mga negosyante sa lugar.
Nakalinya na ang mga pipila ka aktibidades tali sa pagpalambo sa negosyo sa pamilyang Mondejar para sa dugang mga certifications. Kini tungod sa suportang gidunol sa Team Eddiebong uban sa tanan nga ahensiya sa Agusan del Sur, Mayor Masendo ug mga opisyales ning lungsod sa Talacogon. (MPMRM/PIA-Agusan del Sur)
