Agsurnon naka-benepisyo sa libreng pabahay sa Rosario, Agusan Sur
AGUSAN DEL SUR -- Dakong kalipay sa pipila ka mga residente sa Barangay Novele, Rosario, Agusan del Sur, tungod kay usa sila sa palaran nga maka-benipisyo sa libre nga pabahay ni Mayor Jose T. Cuyos Sr.
Mismong sila Mayor Cuyos ug Vice Mayor Eduardo De Paz ang miadto sa mga balay nga puwedi nang ayuhon ug bag-ohon tungod kay guba na kini ug delikado pa gyud ang mabutangan kay anaa sa kilid suba.
Tumong gayod ni Cuyos nga mahimoan ang maong mga indibidwal ug balay tungod kay delikado na kini ug anaa pa gayod namuyo sa kilid sa suba; gani adunay usa ka balay nga hapit na kining mahulog sa pang-pang tungod kay nalusno na ang pundasyon sa haligi sa balay.
Plano usab sa mayor nga hatagan sila ug lote nga anaa nahimutang sa Relocation Site sa Barangay Novele, aron sa ingon niana dili delikado ug tarong na ang matarukan sa ilang balay.
Gipasalamatan gyud kini ug dako sa mga benepisyaryo kay pinaagi sa kaugalingong kwarta ni Cuyos, masulbad ang ilang problema ug aduna pay bag-ong balay. (MIO Rosario/PIA-Agusan del Sur)
