Sitio Zapanta, Kitcharao tukoran na ug eskwelahan
DAKBAYAN SA BUTUAN -- Pagasugdan na ang pagtukod sa eskwelahan sa Sitio Zapanta, Barangay Bangayan lungsod sa Kitcharao ning probinsya human gipahigayon ang signing of Inter-Local Agency Partnership (ILAP) ug groundbreaking ceremony para sa konstruksyon sa 1 unit with five-classroom school building kaniadtong Enero 31, 2024.
Alang sa pagtukod niini, ang lokal nga panggamhanan sa Agusan del Norte sa pagpanguna ni Gob. Ma. Angelica Rosedell M. Amante mihatag og kantidad nga P5 milyon para sa mga panginahanglanon nga materyales sa pagtukod sa maong imprastraktura.
Misaad usab ang buhatan sa DepEd – Agusan del Norte sa presensya ni Schools Division Superintendent, Dr. Jeanie L. Mativo, CESO VI, nga sila maoy mohatag sa mga gikinahanglang gamit sulod sa eskwelahan sama sa mga bangko, blackboard ug apil ang pagbutang og mga mangtutudlo.
“Mohangyo ko sa matag usa kaninyo, tabang ug magpakabana kamo sa mga ekipo o sa unsa mang kalihokan nga gihatag sa probinsya aron paspas nga mahuman ang skwelahan. Kung gusto tag insakto nga kauswagan, kinahanglan ang partisipasyon sa matag usa kaninyo,” awhag ni Gob. Amante sa mga lumulopyo sa Sitio Zapanta.
Ang groundbreaking ceremony nga gipasiugdahan sa gobernador nagtumong nga mahatag ang igong serbisyo ug programa sa kalamboan sa edukasyon sa maong lugar ug mahatag ang komportable nga tulonghaan.
Ang maong kalihokan usab napuno sa mga mensahe gikan kay mayor Jenry E. Montante, Joseph V. Cenones, ug sa kapitan sa Barangay Bangayan. Nakighinabi usab si Brigader General Arsenio DC Sadural PA ug BGEN Francis Marlon Wong PA nga nagpasiugda sa mahinungdanong papel sa edukasyon ngadto sa mga kabatan-onan.
Nahimong posible ang proyekto pinaagi sa pagtinabangay sa technical planning working group (TPWG) sa army engineers, infantry units, local government units, ug DepEd, uban sa pakighiusa sa mga IP community alang sa katumanan sa pagperma sa ILAP.
Ang maong proyekto usab gisuportahan sa buhatan sa DepEd - Agusan del Norte, LGU sa Kitcharao, Joseph V. Cenones, kapitan sa Barangay Bangayan, 901st Brigade, 52nd Engineering Brigade, battalion commander sa 29IB, 54th Engineering, ug ni Provincial Director Felimon O. Pacious sa Philippine National Police - ADN. (SVDeligero, PLGU Agusan del Norte/PIA Agusan del Norte)
