IP representatives sa Las Nieves, nanumpa
LAS NIEVES, Agusan del Norte -- Nanumpa sa buhatan ni Mayor Karen S. Rosales ang Indigenous People’s Mandatory Representative (IPMR) sa Barangay Poblacion nga si Manigaon Zenaida J. Mamalias.
Si Mamalias ang gituboy nga lider sa tribong Manobo sa Poblacion pinasubay sa indigenous political structure sa tribo nga gi-dokumento sa National Commission on Indigenous Peoples (NCIP).
Si Mamalias ang pinakauna nga IPMR nga napaingkod isip miembro sa hawanan sa konseho sa Poblacion bunga sa paningkamot ni municipal IPMR Hawudon Tandawon Armando H. Una II, kaabag ang buhatan sa NCIP.
Ang katungod sa mga tribong komunidad sa pagpa-ingkod ug representante sa hawanan sa konseho sa Sanggunian gilatid sa Republic Act No. 8371 o ang Indigenous Peoples' Rights Act of 1997 (IPRA).
Nanumpa usab dungan ni Mamalias si Esperato D. Mantong, isip miembro sa Sangguniang Barangay sa Rosario.
Ang pagpanumpa sa duha gipangunahan ni Mayor Rosales isip administering official ug gisaksihan kini nila Myrna B. Libao, ang local government operations officer; Anthony M. Japitana, ang punong barangay sa Poblacion; ug Nestor T. Monicar, ang punong barangay sa Rosario. (MPIO-Las Nieves, Agusan del Norte/PIA-Agusan del Norte)
