AICS ipatuman na sa Carmen, AgNor
CARMEN, Agusan del Norte -- Gimando karon sa lokal nga panggamhanan sa Carmen ang pagpatuman sa programa’ng paghatag og Assistance to Individuals in Crisis Situation kun AICS aron sa madako o gamay nga kantidad matubag ang pinansyal nga mga panginahanglanon sa usa ka residente.
Kini ang unod sa bag-ohay pa lamang giaprobahan ug gideklara’ng balido sa Sangguniang Panlalawigan nga Municipal Ordinance No. 03-2023 nga gipangamahanan ni Sangguniang Bayan Rodel O. Pacon nga nagtumong nga matagaan og daliang tabang pinansyal ang mga katawhang Carmenanons nga walay kakapas nga panginabuhian hilabi na niadtong anaa sa krisis o emerhensiya nga sitwasyon.
Ang pagpatuman sa ordinansa nahiuyon sa probisyon sa Provincial Ordinance No. 051-1998, “ An Ordinance Regulating the Grant of Financial Assistance under the Integrated Services Development Assistance Program (ISDAP) to Indigent Residents of the Province of Agusan del Norte.”, diin ang maong AICS pwedeng ipaagi sama sa mga mosunod: transportation assistance within the province - P100 to P500.00; Outside the province - P600 to P2,000; medical - P1,000 to P5,000; burial - P1,000 to P5,000; Educational - Not more than P5,000; Shelter assistance alang niadtong biktima sa bagyo - P1000 to P5,000, sunog, ug displaced family.
Kini subay usab sa mga probisyon sa Department of Social Wefare Development (DSWD) Memorandum Circular No.11-2019 nga i-implementar pinaagi sa buhatan sa Municipal Social Welfare Development Office isip usa sa mga entidad sa gobyerno aron ma-certify ang indigency sa usa ka aplikante, marginalized- vulnerable ug disadvantaged sector.
Ang maong lakang giaprobahan pinaagi sa Sanggunian Resolution No.405-2023 sa pagpangamahan ni Bokal Larry Bautista sa ika-48 sesyon regular. (PLGU Agusan del Norte/PIA Agusan del Norte)
