Cockpit arena sa Jabonga gihatagan prangkisa
JABONGA, Agusan del Norte -- Gihatagan sa lokal nga panggamhanan sa lungsod sa Jabonga og prangkisa si Jerry M. Suyao alang sa pag-operate ug pagmentinar sa cockpit arena nga nahimutang sa maong lungsod.
Kini human gipalabang sa Sangguniang Bayan sa Jabonga ang Municipal Ordinance No. 186-2023 sa pagpaningkamot ni SB member Mernalyn M. Alingato, diin ang maong ordinansa nagtinguha sa pagtugot sa paghatag og prangkisa ang aplikante alang sa pagtukod, operasyon ug pagmentinar sa sabungan ug pagpugong sa mga ilegal nga kalihokan sa sabong nga nahimutang sa Barangay Magsaysay.
Ubos sa Seksyon 5 sa maong ordinansa gi did-an nga ang prangkisa mabalhin sa bisan kinsa. Busa ang grantee dili magbaligya, mag-assign, mag-abang, mohatag sa usufruct o mobalhin niini nga prangkisa lakip ang bisan unsa nga mga katungod ug mga pribilihiyo nga nakuha ubos niini ngadto sa bisan kinsa nga tao natural o juridical, firm o uban pang mga entidad, ni maghiusa sa bisan unsang korporasyon o indibidwal nga wala ang una nga pahibalo ug pagtugot sa Sangguniang Bayan.
Gimando usab sa Seksyon 6 ang pagbayad sa mga buhis ug bayronon nga probisyon. Ang grantee adunay tulubagon sa pagbayad sa tanang buhis ug uban pang bayronon nga gilatid sa Revised Revenue Code sa munisipyo sa Jabonga ngadto sa opisina sa Municipal Treasurer. Ang maong mga balayronon kinahanglan nga walay pagpihig sa mosunod nga mga imposisyon nga mahimong gisagop o human niini mahimong gikinahanglan sa balaod o ordinansa. Ang kapakyasan sa bahin sa grantee sa dali ug regular nga pagtuman sa maong mga obligasyon sa buhis mahimong basehan sa pagbawi o pagkansela niini nga prangkisa.
Gituohan sa mga lokal nga opisyal nga makadugang kini sa panudlanan sa lungsod.
Gi-aprobahan ug gi-deklara’ng balido sa Sangguniang Panlalawigan ang maong lakang sa pagpaningkamot ni Bokal Francisco Y. Chan Jr., tsirman sa Committee on Ways and Means. (Jessica O. Mellejor, PLGU Agusan del Norte/PIA Agusan del Norte)
