Paglambo sa sports sa AgNor, giawhag sa kongresista
Alang kang Kongresista Corvera bag-ong matang sa sport ang beach volleyball sa probinsya ug ang paglambo niini magpasabot nga mapalapad ang laray sa mga mapalambong sports ug mahatagan ang mga lumulupyo ug dugang kapilian nga apilan.
Ang paglapad sa kapilian
maghatag unya sa mga Agusanon ug laing sports nga maglikay kanila gikan sa mga
bisyo, sumala pa sa kongresista pinaagi sa iyang representante sa maong
okasyon.
Dinhi gipaambit usab sa
kongresista nga samtang nagsuporta siya sa mga inisyatiba sa bisan unsang
sports, daku sa iyang atensyon karon anaa pagpalambo sa dulang chess
nga nagpadayon karon ug diin himoon ang turneyo sa mga munisipyo ug dayon sa
level sa probinsya sa bulan sa Hunyo.
Dugang ni Corvera nga ang
pagpahigayon sa lungsod sa Tubay og sports event sama sa beach volleyball
magmugna usab og mga kahigayonan aron mapalambo ang turismo sa lungsod ingon
man sa probinsya.
Pinaagi ning maong beach
volleyball tournament nakita ni Corvera nga ubay-ubay unya ang mga bisita
ang mangabot gikan sa silingang mga lungsod, apil na ang mga residente o
dumadapig gikan sa mga lugar sa players nga apil sa tournament gikan sa Cebu,
Davao ug Misamis Oriental.
Kini, pasabot sa
kongresista, mo-resulta sa ubay-ubay nga produkto ug serbisyo sa lungsod nga
mahalin tungod sa turneyo, halin nga magmugna og dugang bahandi alang sa lokal
nga ekonomiya. (Agusan del Norte 2ndCongressional District
Office/PIA Agusan del Norte)
