Pagmugna og usa ka DRRM-H sa Butuan City, gihisgutan
DAKBAYAN SA BUTUAN -- Gipangunahan ni Butuan City Councilor Eduardo Gonzalez ang pagdungog sa Committee on Health and Sanitation aron mahisgutan ang pagmugna og Functional Disaster Risk Reduction and Management in Health System o DRRM-H sa Butuan City.
Nahibaluan nga ang DRRM-H usa ka integrated system based, multi-sectoral nga proseso nga nag han-ay sa mga palisiya, programa, stratehiya para mamenusan ang risgo sa panglawas gumikan sa mga katalagman ug emerhensiya. Usa sab kini ka mekanismo alang sa pagpauswag sa kapasidad ug pagpangandam sa komunidad aron makunhuran ang mamahimong epekto sa unsa mang peligro.
Panahon nga mapatuman ang nasangpit nga programa lauman nga dunay paspas nga suporta ug paghatag sa nag-unang panginahanglanon subay sa Health Cluster Population Based Services, apil na niini ang Medical ug Public Health. Makasiguro usab nga makahatag sa maayong nutrisyon sa panahon sa emerhensiya, tubig, Sanitation ug Hygiene Services, ug apil ang Mental and Psychosocial nga suporta.
Sa kasamtangan padayon nga gi tun-an ang mga probisyon sa balaodnon sa Komitiba sa Health and Sanitation kauban ang mga partner stakeholders alang sa mas haum ug epektibong implementasyon niini.
Ang nasangpit nga programa suportado sa tibook pwersa sa 16th SP members ug gitahasan usab ang City Health Office nga mamahimong principal implementer sa DRRM-H System. (Butuan City PIO/PIA Agusan del Norte)
#ExplainExplainExplain
