Monday, November 21, 2022

PWDs, LGBT nahatagan og permanenteng FP

BUENAVISTA, Agusan del Norte -- Usa ka bungol-amang, buta ug tomboy na kababayen-an ang naserbisyohan sa Commission on Population and Development (POPCOM) – Caraga kauban ang DKT Philippines Foundation, Inc. sa Bilateral Tubal Ligation (BTL) ug usa ka lalaki ang nahatagan og No Scalpel Vasectomy (NSV).

Taliwala sa 38 ka mga kliyente nga nahatagan ug BTL sa Albor District Hospital, Province of Dinagat Islands, usa ka kliyente niini ang daot ug panan-aw ug usa usab ka kliyente ang dili makasulti ug walay pandungog. Bisan pa sa ilang pisikal na kahimtang, nidesisyon sila na makadawat og BTL isip permanenteng FP method para masuportahan ug tawhanong mapadako ang mga anak. Gawas sa BTL, adunay kliyente nga miagi og salpingectomy procedure tungod sa inpeksyon ug duha ka cysts nga anaa sa toong bahin sa iyang fallopian tube.  

Sa Surigao del Norte, usa ka lalaki ang nahatagan og No Scalpel Vasectomy (NSV) sa Caraga Regional Hospital, Surigao City. Ang maong lalaki, bana sa usa unta ka BTL na kliyente apan basi sa counselling, nahibaw-an nga ang asawa niini dili pwede mahatagan og BTL tungod sa iyang epileptic health disorder apan gagamit kini og IUD isip FP method. Paghuman sa hingpit nga pagtambag, nidesisyon siya nga modawat sa libreng NSV isip puli sa iyang asawa

Dugang pa, adunay 11 ka kliyente ang nahatagan og BTL sa La Paz District Hospital, Agusan del Sur. Ang maong mga kliyente residente sa munisipyo sa La Paz, Agusan del Sur. (Dian Joy L. Martinez, POPCOM Caraga/PIA-Caraga)