(PAGASA 24-HOUR PUBLIC WEATHER FORECAST as of Friday, 25 November 2022) Intertropical Convergence Zone (ITCZ) affecting Mindanao and Palawan. Butuan City, Agusan del Norte, Agusan del Sur, Dinagat Islands, Surigao del Norte and Surigao del Sur will experience Partly cloudy to cloudy skies with isolated rainshowers or thunderstorms due Localized Thunderstorms. Possible flash floods or landslides during severe thunderstorms. Light to moderate winds coming from East to Northeast will prevail with slight to moderate seas / (0.6 to 2.1 meters).


Monday, November 21, 2022

Dugang Pagpasabot sa Balaudnon nga Mag-apil sa Municipal Waters sa Konsiderasyon sa NTA, gihimo ni Kongresista Corvera 

DAKBAYAN SA BUTUAN -- Ang pag-apil sa municipal waters sa konsiderasyon sa national tax allocation (NTA), o naila nga Internal Revenue Allotment (IRA) kaniadto, lakang aron mahimong patas ang bahinay niini sa mga local government units (LGU) ug daku ang mahimong tampo niini pagpalambo sa mga lugar sa daplin sa kadagatan.

Kini ang gipanghingusgan ni Kongresista Dale B. Corvera sa dugang pagpasabot nga iyang gihimo sa interview sa Radyo Pilipinas ganihang buntag, Nobyembre 18, kalabot sa House Bill No. 6120 nga iyang gipasaka sa miaging semana.

Ubos sa maong gisugyot nga balaud buot ni Kongresista Corvera nga amendahan ang Section 285 sa Local Government Code of 1991(LGC) ug iapil ang municipal waters isip dugang konsiderasyon sa pagtakda sa bahin sa matag LGU sa NTA.

Ang probisyon sa Section 285 nagtakda sa population, land area ug equal sharing isip basehan sa bahinay. 

Dili kini patas sa mga LGU nga naay municipal waters, sumala pa kang Kongresista Corvera. 

Gipasabot sa kongresista sa maong interview nga lahi sa mga landlocked LGUs nga ang galastuhan alang lang sa mga programa sa kayutaan niini, ang mga LGUs nga naay kadagatan sa ilang teritoryo naggahin usab og pundo alang sa mga programa nga magpalambo o magprotekta ning maong bahin sa ilang tagsa-tagsa ka lugar, apil na ang alang sa mga mangingisda o bantay dagat. 

Gani, sumala pa sa maong gisugyot nga balaudnon, gipun-an pa ang kaakuhan sa mga LGUs nga naa sa daplin sa dagat diha sa Republic Act 8550 o ang Philippine Fisheries Code of 1998. Gihatag ning maong balaud sa LGUs ang responsibilidad pagdumala, pagkonserba, pagpalambo, pagprotehir, pag-utilize ug pagdisposar sa tanang isda ug fishery/aquatic resources sulod sa ilang tagsa-tagsa ka municipal waters apan wala kini maglakip og adjustment sa mga factors nga i-konsidera pagbahina sa NTA.

Ipuno pa dinhi ang konsiderasyon nga ang mga komunidad sa daplin sa dagat maoy labing nameligro sa mga bagyo o tsunami hinungdan nga magpahiluna gyod silag mga proyekto aron mapudgan ang kadaut sa lugar ug sa mga lumulupyo niini.  

Walo sa 10 ka LGUs nga sakop sa congressional district ni Kongresista Corvera naa sa daplin sa dagat. Sa Pilipinas, sobra sa katunga sa mga LGUs naa sa daplin sa dagat.

Sumala pa kang Kongresista Corvera, nga miagi pagka-mayor ug gobernador sa mga LGUs nga naay lapad nga municipal waters, nga daku ang mahimong tampo sa pagpalambo pa sa mga lugar nga naay municipal waters kung naay adjustments nga himoon sa konsiderasyon sa alokasyon sa NTA.  

Isip panapos sa maong interview, gipaneguro ni Kongresista Corvera nga padayon siyang magpanday og mga balaudnon nga magdala sa katawhan sa distrito ug nasud ngadto sa mas taas nga estado sa paglambo. (Agusan del Norte 2nd Congressional District Office/PIA Agusan del Norte)