iHOMIS i-implementar sa AgNor Provincial Hospital Annex
DAKBAYAN SA BAYAN -- Gitakdang i-implementar sa Agusan del Norte Provincial Hospital Annex nga nahimutang didto sa lungsod sa Nasipit, Agusan del Norte ang Integrated Hospital Operations and Management Information System (IHOMIS).
Ang iHOMIS usa ka computer-based information system nga gimugna sa DOH aron suportahan ang pagdumala sa ospital alang sa epektibo ug dekalidad nga pag-atiman sa panglawas pinaagi sa paghatag og tukma , may kalabutan ug kasaligan nga impormasyon. Kini aron makab-ot ang panglantaw sa National e-Health Program nga, “An ICT-enable Philippine Health System towards better and equitable access to quality health care services, and easier access to secure real time and quality health date and information for evidenced-based decision making”.
Ang iHOMIS software ihatag kini nga libre alang sa mga interesadong pampublikong ospital lakip na ang pagbansay ug teknikal nga suporta ubos sa pagsunod sa mga sumbanan sa Health Facility Development Bureau (HFDP) alang sa mga operasyon sa ospital, acceptability sa ICT nga imprastraktura ug commitment alang sa pagdumala ug pagsuporta sa operasyon sa ospital lakip na ang pagkabaton og duha ka IHOMIS system administrator.
Mandato kini ubos sa Administrative Order No. 44-A series of 1994, aron mapauswag ang kalidad sa pagdumala ug kaluwasan sa pasyente isip gambalay, computer-based environment , pagtukod ug paghiusa sa kasamtangan nga sistema sa impormasyon sa ospital, pag-standardize sa dagan sa impormasyon sulod ug taliwala sa mga ospital, hingpit nga paggamit sa datos sa ospital alang sa evidence base decision-making ug pagpalambo sa computer software alang sa programa base sa DOH standards ug sa International Classification of Diseases.
Aron epektibo ang implementasyon sa iHOMIS, ang Sangguniang Panlalawigan sa Agusan del Norte gihatagan otoridad si Provincial Governor Dale Corvera alang sa pagpirma sa MOA pinaagi sa Sanggunian Resolution No. 158-2022 nga gipanginahanan ni Provincial Board Member Elizabeth Marie Calo, tsirman sa Committee on Health and Nutrition.
Ang paghatag otoridad giaprobahan atol sa sesyon regular sa SP niadtong Marso 28. (LGU-Agusan del Norte/PIA-Agusan del Norte)
