Barangay Hall sa San Antonio, lungsod sa Libjo, Dinagat Islands pormal na gi-ablihan
SAN JOSE, Dinagat Islands -- Pormal na nga gi-turnover sa lokal nga pangagamhanan sa probinsya sa pagpanguna ni Gobernador Kaka Bag-ao ang bag-ong natukod nga Barangay Hall o Multi-Purpose Building ngadto sa mga katawhan ug tigdumala sa Barangay San Antonio, lungsod sa Libjo.
Malampuson nga napatuman ang maong proyekto tungod sa padayong pakigtimbayayong sa mga opisyal sa Barangay San Antonio ngadto sa Provincial Government alang sa hugot nga implementasyon sa mga prayoridad nga proyekto.
Usa ang barangay hall sa mga proyekto isip himan alang sa maayong pagpanerbisyo sa mga opisyales ngadto sa katawhan ug magamit sa bisan unsang matang nga aktibidad ug kalihukan sa mga lumulupyo.
Sa mensahe ni Punong Barangay Melody Llamera-Compasivo, gi-implementar kini nga proyekto niadtong kongresista pa si Gob. Kaka ug ingon pa niya, dugay na kining nahuman apan wala dayon na turnover tungod kay gigamit pa kini sa katawhan isip quarantine facility.
Nanghinaot Si Punong Barangay Compasivo nga mohangtod kini sa dugay na panahon aron mapahimuslan sa mga lumulupyo.
Sigon pa ni Mayor Lamberto Llamera, Jr, gipalit sa barangay ang yuta aron tukoran ug multi-purpose building kay nakita sa mga opisyal nga mas dali kini madangpan sa mga barangayanon ug kini nga lugar usa ka race track kaniadto.
Sa iyang kabahin Si Gob. Kaka Bag-ao miingon nga aduna pa’y daghang barangay hall nga proyekto nga humanunon aron magamit sa mga katawhan ug lakip na niini ang mga kalsada ug water system alang sa dugang pagpalambo sa kinabuhi sa katawhan ug sirkulasyon sa ekonomiya sa probinsya luyo sa hagit sa COVID-19 pandemic.
Gipadayag usab ni Gob. Bag-ao nga gikinahanglan nga maprotektahan ang mga watershed area nga mao’y tinubdan sa tubig.
Dugang pa niya, nga mahuman na ang RORO port nga mao’y gamiton alang sa transportasyon sa mga bus nga mosulod ug gawas sa probinsya.
Ang maong kalihukan madasigon nga gitambungan nila Board Member Lyn Dialde (District 1), Libjo, Vice Mayor Zoltan Edera, Sangguniang Bayan members, barangay officials, mga lumulupyo sa naasoy nga barangay, Provincial Legal Office (PLO), Provincial Community Affairs Office (PCAO), Provincial Environmental and Natural Resources Office (PENRO), Office of the Provincial Architect (OPARCH), Provincial Engineering Office (PEO), Provincial Planning and Development Office (PPDO), ug Provincial Labor, Employment, and Manpower Office (PLEMO). (LGU-Libjo/PIA-Dinagat Islands)
