Nakabenepisyo sa programa sa DSWD Caraga, nagpaabot ug pasalamat
DAKBAYAN SA BUTUAN -- “Ang programa sa Department of Social Welfare and Development (DSWD) sama sa AICS, dakong tabang gayud para sa mga nanginahanglan,” pahayag ni Adela D. Lapating, 66 anyos, residente sa Purok 1, Brgy. Tagabaca, Butuan City, nga nakadawat og medical assistance gikan sa Department of Social Welfare and Development (DSWD) Field Office Caraga ilawom sa Assistance to Individuals in Crisis Situation (AICS) program.
Nagpasalamat si Lapating sa mas hapsay ug organisadong proseso sa pagkuha og tabang, ilabi na kay nakatabang kini sa ilang pamilya nga misagubang sa krisis. Ang ilang nadawat nga tabang gamiton aron mapalit ang tambal para sa iyang umagad nga adunay movement disorder ug x-linked dystonia parkinsonism.
“Mas nindot na gyud ang proseso karon. Kung una ka makaabot, una sab ka ma-accommodate. Dili na hasol ang pagpila—human nimo og fill-up sa mga papel, maghulat lang ka tawagon. Buotan pa gyud ug maabi-abihon ang mga staff,” pahayag ni Lapating.
“Dili ni unang higayon nga miduol mi sa DSWD. Sa miaging mga tuig, nangayo pud mi og tabang para sa maintenance sa akong bana. Apan karon, giuna namo ang akong umagad nga mas nanginahanglan sa tambal,” dugang ni Lapating.
Ang DSWD Caraga, pinaagi sa AICS program, padayon sa pagpasiugda sa mga lakang aron mapadali ang paghatod sa tabang ngadto sa mga labaw nga nanginahanglan. Tumong sa programa nga matabangan ang mga indibidwal ug pamilya nga naa sa krisis o kalisod. (DSWD Caraga/PIA Caraga)
