Sitio Monte Grande sa Santiago tukoran og bag-ong eskwelahan
SANTIAGO, Agusan del Norte -- Pagasugdan na ang pagtukod sa eskwelahan sa Sitio Monte Grande, Barangay Poblacion 1 sa lungsod sa Santiago ning probinsya human gipahigayon ang signing of Inter-Local Agency Partnership (ILAP) ug groundbreaking ceremony para sa konstruksyon sa 1 unit, 1 story 4 classrooms nga school building.
Ang Philippine Army 52nd Engineer Brigade under BGen. Jose Eduardo Liboon maoy mangunay sa pagtukod niini diin ang probinsya usab maoy naghatag sa mga construction materials.
Ang groundbreaking ceremony nga gipasiugdahan ni Gob. Ma.Angelica Rosedell Amante uban ni Congressional Rep. Dale Corvera nagtumong nga mahatag ang igong serbisyo ug programa sa kalamboan sa edukasyon sa maong lugar ug mahatag ang komportable nga tulonghaan.
Mahimong posible ang gi-saad nga proyekto pinaagi sa pagtinabangay sa Technical Planning Working Group (TPWG) sa army engineers, infantry units, local government units, ug DepEd uban sa pakighiusa sa mga indigenous peoples (IP) community alang sa katumanan sa pagperma sa ILAP.
Ang maong proyekto usab gisuportahan sa buhatan sa DepEd-Agusan del Norte, LGU-Santiago sa pagpanguna ni Municipal Mayor Zenaida Lim, Poblacion 1 Punong Barangay Allan M. Luz, 901st Brigade, 52nd Engineering Brigade, battalion commander sa 29IB, 54th Engineering, ug ni Provincial Director April Mark C. Young sa Philippine National Police-Agusan del Norte. (PLGU Agusan del Norte/PIA Agusan del Norte)
