Agusan del Norte pun-an 2 ka dugang SP members
DAKBAYAN SA BUTUAN -- Karong umaabot nga eleksyon Mayo 12, 2025, adunay 2 ka dugang bokal sa Sangguniang Panlalawigan (SP) sa Agusan del Norte ang pilion sa katawhan.
Sa kanhing walo, mahimo nang 10 ang miyembro sa SP sugod Hulyo 1 ning tuiga, kini epekto sa 1st class na nga income classification sa Agusan del Norte sa kanhing 3rd class lamang.
Basi sa Commission on Elections (COMELEC) Resolution No. 11085, ang mga probinsya nga gi-classify nga 1st to 2nd class, adunay katungod nga magbaton og 10 ka bokal (provincial board member), kadtong 3rd og 4th classes adunay 8, samtang 6 usab sa 5th – 6th class nga mga probinsya.
Tungod niini, gi-aprobahan na sa SP ang Provincial Appropriation Ordinance No. 729-2025 sa pagpangamahan ni Bise-Gobernador Enrico R. Corvera nga nag-appropriate og pundo alang sa operasyon lakip na ang suholan sa mga empleyado sa buhatan sa nasangpit nga duha ka bokal.
Kahinumduman nga epektibo Enero 1, 2025, usa na ka 1st class nga probinsya ang Agusan del Norte basi sa reclassification order nga gi-issue sa Department of Finance (DOF) alang sa probinsya. Kini giadaptar sa SP pinaagi sa Provincial Resolution No. 590-2024 sa pagpangamahan ni Bise Gobernador Enrico R. Corvera.
Subay sa guidelines sa DOF, ang usa ka 1st class nga probinsya nagbaton og average annual income nga P1. 5 bilyon o dako pa basi sa annual regular income niini sulod sa tulo ka tuig diin ang Agusan del Norte matod pa mipasar niini nga kwalipikasyon. (PLGU Agusan del Norte/PIA Agusan del Norte)
