Ram pump irrigation system, gi-turnover ngadto sa Cabalawan Farmers Association sa Libjo
DINAGAT ISLANDS - Ang provincial government sa Dinagat Islands, pinaagi sa Provincial Agricultural and Biosystems Engineering Office (PABEO), padayon sa pagmugna og mga programa isip solusyon sa problema sa mga mag-uuma, diin niadtong Marso 21 malampusong nga gipahigayon ang ceremonial turnover sa ram pump irrigation system nga nagkantidad og P 1,032,967.60, ngadto sa Cabalawan Farmers Association, Sitio Cabalawan, Brgy. Garcia, Libjo, sakop ning probinsya.
“Kini nga inisyatibo sa probinsyal government nagtumong nga matabangan ang asosasyon sa mga mag-uuma diri sa probinsya nga mamahimong magmalahutayon ang ilang panginabuhian, diin usa sa problema sa mga mag-uuma maong ang tubig alang sa ilang mga pananom rason nga namugna kining ram pump irrigation system,” nag-ingon si Gov. Nilo P. Demerey Jr.
Matud pa sa gobernador dili na hasol ug wala’y gastohon ang farmers niini tungod kay gamay og low maintenance, dili maggasto og krudo, dili maggasto og kuryente, paabot ra gyud sa tubig ituklod pud sa tubig padulong sa tangki.
Dakong ang pasalamat ang gipaabot ni Cabalawan Farmers Association President Ronie Beronguis, ngadto sa panggamhanan sa probinsya sa pagtubag sa ilang dugay ng gipangandoy nga tangki aron dili na lisud ug layo maghakot og tubig alang sa ilang mga pananom.
Atol sa maong seremonya anaa ang presensya ni District 2 Board Member Ana Lyn Dialde, Provincial Environment and Natural Resources Officer Dennis Banacia, Provincial Community Affairs Officer Jay Benitez, Provincial Tourism and Cultural Officer Benlen Navas, kanhi chief of staff to the governor, ug mga miyembro sa Cabalawan Farmers Association. (Alrose Pis-o, PIO PDI/ PIA Dinagat Islands)
