Ihap sa mga nagparehistro sa i-Registro, misaka; balidasyon nagpadayon
DAKBAYAN SA BUTUAN -- Padayon ang gihimong balidasyon sa Department of Social Welfare and Development (DSWD) Field Office Caraga pinaagi sa National Household Targeting Section (NHTS) sa mga rekisitos nga gisumiti sa mga miyembro sa Pantawid Pamilyang Pilipino Pogram (4Ps) gamit ang i-Registro sa rehiyon.
Ang i-Registro usa ka digital ug self-service platform para lamang sa mga benepisyaryo sa 4Ps. Kini adunay web portal para sa pag-update sa mga benepisyaryo nga kasamtangang buros o adunay anak nga nag-edad o ngadto 24 ka bulan.
Kini usa ka alternatibo ug bag-ong pamaagi aron paspas ang pag-update sa mga impormasyon sa Pantawid Pamilya Information System (PPIS) nga gikinahanglan sa programang 4Ps aron husto ang pagpatuman sa First 1,000 days (F1KD) conditional cash grant.
Sa pagkakaron, anaa na sa 1,690 ka mga miyembro ang nagparehistro gamit ang i-Registro diin lauman pa kining musaka sa pipila ka mga adlaw. Kini resulta sa pagtinabangay sa 4Ps Regional Program Management Office (RPMO) ug NHTS sa tumong nga mapaspasan ang pag-update sa impormasyon sa mga miembro sa maong programa.
Subling nagpahimangno ang buhatan nga ilakip lamang ang mga dokumento alang sa mga buros o adunay anak nga nag-edad 0 ngadto 24 ka bulan aron mapadali ang balidasyon sa mga rekisitos ingon man dali usab ang pag-aprobar niini.
Alang sa mga buros, ilakip ang Medical Certificate o ultrasound; samtang sa kadtong adunay mga anak nga nag-edad 2-anyos paubos, e-attached ang Birth Certificate sa bata, bakuna booklet, ug Nanay and Baby book. (DSWD Caraga/PIA Caraga)
