Tulo ka barangay sa Las Nieves, mipasar sa 2024 SGLGB
LAS NIEVES, Agusan del Norte -- Mipasar sa nasyonal nga lebel sa Seal of Good Local Governance for Barangay (SGLGB) alang sa tuig 2024 ang tulo ka barangay sa lungsod sa Las Nieves.
Kini mao ang Barangay Lingayao, San Isidro, ug San Roque.
Ang SGLGB usa ka programa sa Department of the Interior and Local Government (DILG) nga nagtumong sa pag-ila ug pagpasidungog sa mga barangay nga nagpakita og maayong pangagamhanan.
Kini nagtumong usab sa pagpalig-on sa integridad, transparensiya, ug kalidad sa serbisyo publiko sa lokal nga lebel.
Ang SGLGB nag-evaluate sa mga barangay base sa tulo ka core areas: peace and order; financial administration; ug disaster preparedness, ug usa ka essential area sama sa social protection, business friendliness, o environmental management.
Sumala sa datos nga gipagawas sa DILG, ang maong tulo ka barangay sakop sa 50 ka barangay sa tibuok Agusan del Norte ug 302 ka barangay sa tibuok rehiyon sa Caraga nga mipasar sa 2024 SGLGB nga ebalwasyon.
Ang SGLGB gipahinungod sa pag-ila niadtong mga barangay nga nagpakita og maayong pagdumala, sakto nga panggamhanan, ug aktibong pagpalambo sa ilang komunidad.
Kining kalampusan nagpakita sa dakong paningkamot sa mga opisyales ug lumulupyo sa maong mga barangay aron masiguro ang maayong serbisyo ug pagpalambo sa ilang lugar.
Kini nga pag-ila dili lamang nagdala og dakong pasigarbo sa lungsod kondili naghatag usab og inspirasyon sa ubang barangay nga mosulay og mas maayong panggamhanan alang sa kalambuan sa ilang mga komunidad. (MIO-Las Nieves, Agusan del Norte/PIA-Agusan del Norte)
