Sub-project appraisal sa farm-to-market road sa Libjo gipahigayon
Dinagat Islands - Kauban ang mga personahi gikan sa National Project Coordination Office (NPCO), Project Support Office (PSO), Regional Project Coordination Office (RPCO) ug mga tinugyanan gikan sa nagkadaiyang components sa Dinagat Islands PPMIU, opisyal nang gipahigayon ang appraisal and review sa PRDP Sub -Project No.2 nga farm-to-market road (FMR) nga magkonektar sa walo ka mga barangay sakop sa lungod sa Libjo niadtong Pebrero 11.
Kini gilangkuban sa pagpahigayon og pakighinabi sa mga apiktadong residente, ug mga detalye sa proyekto ilabi na ang mga dapit nga magi-an sa konstraksyon sa kalsada ugaling kini pagasugdan na. Ang SPAR usa sa mga rekisitos nga kinahanglang pagahimuon adiser masugdan ang proyekto.
Ang Sub -Project 2 sa Philippine Rural Development Project (PRDP) nga usa sa mga natanyag niini ng ahensya dinhi sa Dinagat Islands may gitas-on nga 4.1 kilometros nga adunay kantidad nga mukabat ngadto sa P152 milyones. Ang mga hilit nga dapit nga makonektar niini nga kalsada mao ng Sitio Patag, Barangay Garcia, ug Dela Concepcion, Barangay Sto. Nino nga parehong sakop sa lungsod sa Libjo, samtang ang Albor lakip sa mga barangay nga nasulod sa road influence area (RIA) sa naasoy nga proyekto. Pipila sa mga nag-unang produkto niini nga mga lugar mao ang cassava(kalibre), saging, kalamansi,lubi,ug watermelon nga nag-unang tinubdan sa panginabuhian niini nga dapit.
Sa iyang kabahin, malaumon si Governor Nilo P. Demerey Jr.,MPM nga mapadali kini nga proyekto aron mapahimuslan na sa mga mag-uuma og mas mulambo pa ang produksyon sa mga nag-unang lagutmon niini nga lugar, gisugyot usab sa gobernador ngadto sa mga personahi sa NPCO,PSO,RPCO ug PPMIU ang produksyon sa oysters human makita nga posibli ang produksyon niini sa nahisgutang lugar.
Mahinumduman nga nahimo nang kabahin sa kalambuan ang PRDP sa Dinagat Islands dili lamang sa FMR diin lakip na niini ang edipisyo og mga pasilidad nga diin benepisyaryo niini ang mga giilang organisasyon, people’s organizations, mga mag-uuma lakip ang mga mangingisdang sektor. (Jimmy S. Jara, PIO PDI/PIA-Dinagat Islands)
