Special drug education center sa Agusan Norte gi-establisar
DAKBAYAN SA BUTUAN -- Aprobado na sa Sangguniang Panlalawigan sa Agusan del Norte bag-ohay lang sa ikaduha ug ikatulo nga pagbasa ang Provincial Ordinance No. 728-2025, nga nagtumong sa pag-establisar sa Special Drug Education Center (SDEC) alang sa mga out-of-school youth (OSY) ug mga street children sa probinsya.
Gikan sa mga pagtuon, nakit-an nga daghan sa mga OSY ug street children ang apektado sa ilegal nga droga tungod sa peer pressure, kakulangan sa mga oportunidad sa trabaho, ug kawad-on sa husto nga giya gikan sa pamilya o komunidad.
Nakita sa mga magbabalaod nga ang pagtukod sa SDEC magahatag og dako nga tabang sa mga kabataan nga nanginahanglan og interventions aron maprotektahan sila gikan sa kadaot nga dala sa droga.
Ang SDEC magahatag og mga programa nga naglangkob sa advocacy, capacity building, monitoring and evaluation, ug serbisyo nga mag-aplikar sa edukasyon ug rehabilitasyon. Apil sa mga serbisyong itanyag ang literacy programs, family counseling, community participation, recreational ug socio-cultural activities, spiritual enhancement, ug referral services.
Dugang pa, ang Provincial Social Welfare and Development Office (PSWDO) ipahimutang isip center head sa SDEC, nga magpasiugda sa mga programa sa prevention ug information campaigns sa mga komunidad.
Ang ordinansa nagtinguha nga masugpo ang problema sa droga sa probinsya pinaagi sa edukasyon ug rehabilitasyon sa mga kabatan-onan nga na-apektohan niini. Ang SDEC magahatag og dakong paglaum sa kabatan-onan nga gusto magbag-o ug magpadayon sa mas maayong kinabuhi.
Sa rekomendasyon sa komitiba sa Peace and Order and Drug Abuse Prevention and Control, ang nasangpit nga lakang naaprobahan niadtong Pebrero 11 atol sa sesyon regular sa SP. (PLGU Agusan del Norte/PIA-Agusan del Norte)
