Pagpakusog sa mga sustainable livelihood program sa Dinagat Islands, gitutokan
DINAGAT ISLANDS -- Personal nga mitambong sa buhatan ni Governor Nilo P. Demerey Jr, MPM sa presensya ni Atty. Niel Edward M. Demerey, isip Chief of Staff, ang mga personahe sa Department of Social Welfare and Development (DSWD) Caraga pagpanguna ni Assistant Regional Director for Operations Jean Paul Parajes aron hisgutan ang mga importante nga butang alang sa mga benipisyaryo sa Sustainable Livelihood Program sa probinsya sa unang kwarter sa tuig nga 2025, niadtong Enero 30.
Usa sa mga importante nga butang nga ilang nahisgutan mao ang mga asosasyon nga tagumpay nga nakapasar sa gihimong assessment sa DSWD sa niagi nga mga bulan.
Matod pa ni DSWD Caraga Grieviance Officer Kim Batangoso, adunay 23 nga tagumpay nga nakapasar niini samtang adunay pay dungag duha nga padayon gihapon nila ginatabangan aron ma-apil ug madungan kini sa target obligation date nga ilang gitakna sa muabot nga Pebrero sa kasamtangang tuig.
Mapasalamaton si Atty. Demerey sa maong maayong balita ilabi na ngadto sa mga kugihan nga personahe sa DSWD Dinagat Islands nga padayon sa paglihok aron matabangan ang tanang asosasyon nga mahimong benipisyaryo sulod sa atong probinsya.
Malaumon usab nga nipasalig si ARD Parajes nga padayon usab sila nga makigtinabangay ug maningkamot nga mas daghan pa ang mahatagan og oportunidad nga masuporta-an og panginabuhian pinaagi sa mga programa sa Sustainable Livelihood Program sa ilang ahensya.
Anaa usab sa maong panagkita si Pelic Despi, PGO focal person on agriculture, ug uban pa nga mga personahe sa DSWD. (Gov. Nilo P. Demerey Jr./PIA-Caraga)
