Legal ug environmentally-sound nga operations sa minahan sa Agusan Norte, ipahiluna
DAKBAYAN SA BUTUAN -- Hiniusang ipahiluna nila ni Governor Ma. Angelica Rosedell M. Amante ug Kongresista Dale B. Corvera ubos sa hiniusa nilang kampanya sa pagpalambo nga mao ang AGUSAN UP! ang legal ug environmentally-sound nga operisyon sa mga small scale mining sa Agusan del Norte.
Sa meeting tali sa mga personahe sa Environment and Natural Resources Division (ENRD) ubos sa Provincial Governor’s Office ug sa Congressional District Office (CDO) ni Kongresista Corvera, inisyal nga gihisgutan nila ang kahimtang sa operisyon sa small scale mining sa probinsya ug gilatid ang pipila ka posibleng mga lakang aron mapahapsay kini.
Ang nakita mao nga kinahanglang magsunod kini sa mga reglamento ubos sa programa sa “Minahang Bayan” ug subay sa mga modelo sa pagpalambo ning maong ekonomikanhong kalihukan sa uban pang lugar sa nasud.
Nahibaw-an nga pipila ka mga grupo sa mga indigenous peoples (IP) ang kasamtangang nag-apply ubos sa “Minahang Bayan” program alang sa bulawan ug coper ug buot sa duha ka nag-unang lider sa probinsya nga mapahiluna alang kanila ang hapsay nga operisyon.
Apil sa mga nahisgutan mao ang kalabot sa mahimong kolaborasyon aron maseguro nga makakuha kining mga gagmay’ng minero og teknolohiya og mga himan, ingon man ang mga pagbansay, alang sa high quality ug environmentally-sound nga processing sa mga minerales.
Tumong usab nga ma-establisar ang suod nga relasyon sa gamay’ng minero sa mga representante sa central bank alang sa hapsay nga pagpamaligya unya sa produkto nilang mga minerales.
Nauyonan sa maong panagtigum nga humanon sa mosunod nga mga semana ang drafting sa mga plano nga usahon sa roadmapping nga himoon sa bulan sa Pebrero.
Nanguna sa maong meeting sila si ENRD Chief Romina C. Altorino ug si Orencio S. Corvera Jr., ang services coordinator sa CDO ug sa AGUSAN UP! (Grezel Jane L. Gulay, Agusan del Norte Congressional District Office/PIA-Agusan del Norte)