Dugang benepisyo sa mga sentenaryo sa Las Nieves, gi-okehan
LAS NIEVES AGUSAN DEL NORTE -- Makadawat na og dugang benepisyo ang mga senior citizen nga nakaabot sa edad nga 100 ka tuig o mga sentenaryan sa lungsod sa Las Nieves kini mao’y unod sa Municipal Ordinance No. 629-2024 nga nagmando niini.
Matod sa ordinansa, ang mga sentenaryo nga buhi pa ug nagpuyo sa maong lungsod mahatagan og pinansyal nga ayuda sa kantidad nga P50,000 ug dugang pa nga P50,000 alang sa mga senior citizen nga nakaabot sa kapin 100 ka tuig.
Ang maong lakang subay sa Republic Act No. 10868 o "Centenarians Act of 2016," nga nagahatag og espesyal nga mga pribilehiyo alang sa mga sentenaryo ug subay usab kini sa Republic Act No. 9994 o ang "Expanded Senior Citizens Act of 2010."
Sa rekomendasyon sa Committee on Social Welfare, Population, and Development, diin tsirman si Bokal Larry F. Bautista uban sa suporta nila Bokal Rodolfo A. Pitogo ug Bokal Inez Rosario R. Amante, ang maong ordinansa gideklara nga balido ug giaprobahan pinaagi sa Sanggunian Resolution No. 008-2025 atol sa sesyon regular sa SP niadtong Enero 14.
Kini nga lakang usa ka paagi sa pagpasidungog sa mga senior citizen, labi na sa mga nakaabot sa sentenaryan status, isip pasalamat sa ilang kontribusyon sa komunidad. (MIO Las Nieves, Agusan del Norte/PIA-Agusan del Norte)
