Bahay ni Neneng pagatukoron sa Nasipit
NASIPIT, Agusan del Norte -- Andam na mopirma si Governor Ma. Angelica Rosedelle M. Amante sa ngalan sa lokal nga panggamhanan sa Agusan del Norte sa Memorandum of Agreement tali sa Jodel Construction Supply ug MDSE, para sa pagtukod sa Bahay ni Neneng sa Barangay Kinabhangan, Nasipit nga adunay kantidad nga P4,990,937.52.
Ang Bahay ni Neneng usa ka pasilidad nga pagatukoron aron magsilbing one-stop shop ug mahimong gamiton isip recovery shelter sa mga biktima sa rape ug may kalabutan sa mga kasong Violence Against Women and Children (VAWC).
Ang lokal nga panggamhanan sa Agusan del Norte ug ang Jodel construction supply ug MDSE, nagkauyon sa pagtuman, pagsunod ug pagsumite sa bisan unsa ug sa tanan nga mga probisyon ug mga kinahanglanon nga nakalatid sa kontrata.
Prayoridad kini sa munisipyo sa Nasipit nga maimplementar dayon ang maong proyekto.
Ang maong lakang gipalabang pinaagi sa Sangunian Resolution No. 482-2024 sa pagpanguna ni Bokal Dick Victor B. Carmona, tsirman sa Committee on Public Works, inabagan nila SB members Ryan Jade D. Lim ug Rodulfo A. Pitogo atol sa ika 106 Sesyon Regular kaniadtong Novembre 4. (Ramil L. Pasco, PLGU-Agusan del Norte/PIA-Agusan del Norte)
