Certificate of conformity gimando niadtong namaligyag PNP uniform sa Las Nieves
DAKBAYAN SA BUTUAN -- Pinaagi sa ordinansa, gimandoan ang tanang nag-negosyo og Philippine National Police (PNP) uniforms sa lungsod sa Las Nieves nga mag-secure og PNP Certificate of Conformity (COC) aron legal kining mag-operate.
Kini ang unod sa Municipal Ordinance No. 616-2024 aron masiguro nga ang tanang produkto nga nagrepresentar sa PNP nagtuman sa mga angay nga pamantayan, ang paghatag og proteksyon sa mga konsumidor ug pagpalambo sa kredibilidad sa mga produkto nga ilang ginabaligya.
Kini nga mando naglangkob niadtong nagabaligya og PNP uniform lakip na ang insignias niini. Subay sa maong ordinansa multahan ang dili pagsunod niini nga mando pinaagi sa multa ug posible nga suspensyon o pag-revoke sa ilang business permits. Ang mga item nga madakpan sa paglapas mahimong i-confiscate.
Ang ordinansa gideklarar nga balido pinaagi sa Sanggunian Resolution No. 471-2024 sa pagpangamahan ni Bokal Francisco Y. Chan, Jr., tsirman sa Committee on Ways and Means, kauban nila SB members Rodulfo A. Pitogo ug Erwin L. Dano. (PLGU-Agusan del Norte/PIA-Agusan del Norte)
