Employment office sa Agusan Norte, naglusad ug job hiring
DAKBAYAN SA BUTUAN -- Ubay-ubay nga mga Agusanong jobseekers ang misalmot sa gipahigayon nga Overseas Job Fair didto sa Event Center, SM Butuan City niadtong Septyembre 16.
Gipangunahan kini sa buhatan sa Provincial Public Employment Service Office (PPESO) Agusan del Norte sa pagpangulo ni PPESO Manager Procerfina C. Santillan, katimbayayong ang buhatan sa Department of Labor and Employment (DOLE) Agusan del Norte.
Ang mga ahensya nga nang recruit og mga trabahante mao ang musunod: 9K International Manpower and Recruitment Services Corp., Placewell International Services Corp., Jake Intl Manpower Services Inc., Eastwest Placement Center Inc., Jenerick International Manpower Inc. ug MMML Recruitment Services Inc.
Katuyuan sa maong aktibidad nga mahatagan og oportunidad ang mga indibidwal nga makapanimpalad sa gawas sa nasud diin makasiguro sila nga luwas ug akreditado ang mga recruitment agency nga ilang maduolan.
Alang sa dungang impormasyon bahin sa lokal ug internasyonal nga job hiring, mamahimong maki-update sa Facebook account nga Provincial Public Employment Service Office - Agusan Del Norte. (RJSE, PLGU-Agusan del Norte/PIA-Agusan del Norte)
