Coastal cleanup drive, gi-imposar sa Nasipit
DAKBAYAN SA BUTUAN -- Aron mamintinar ang kahinlo sa mga baybayon sa lungsod sa Nasipit, Agusan del Norte nagpalabang kini og Municipal Ordinance No. 008, series of 2024 nga nagmando sa tanang mga coastal barangays nga magpahigayon og coastal cleanup drive.
Ang mga gi-ilang coastal barangays mao ang musunod: Barangay 1, Barangay 4, Barangay 5, Amontay, Aclan, Camagong, Sta. Ana, Punta, Talisay, Ata-atahon ug Cubi-cubi.
Pagabuhaton ang maong clean-up drive matag katapusang Sabado sa kada bulan diin manguna sa monitoring niini ang buhatan sa Municipal Environment Office (MENRO) kauban ang Municipal Disaster Risk Reduction Management Office (MDRRMO) sa maong lungsod.
Katuyuan sa maong aktibidad nga mapakgangan ang pagbaha ug mapromotar ang limpyo ug hamugaway nga baybayon sa lungsod.
Pinaagi sa Sanggunian Resolution No. 379-2024, gideklara kining balido sa pagpangamahan ni Bokal Ryan Jade D. Lim, tsirman sa komitiba sa Environment and Natural Resources inabagan nila Bokal James T. Reserva ug Dick Victor B. Carmona. (RJSE, PLGU Agusan del Norte/PIA-Agusan del Norte)
