Kaayuhan sa mga unibersidad sa Mindanao nahisgutan sa opisina ni Rep. Plaza
AGUSAN DEL SUR -- Sa talagsaong higayon mibisita si Mindanao State University - Iligan Institute of Technology (MSU-IIT) Chancellor Atty. Alizedney M. Ditucalan sa opisina ni Congressional Representative of District 2 Agusan del Sur Adolph Edward "Eddiebong" Plaza ug Congressional Representative of District 1 Agusan del Sur Alfelito "Alfel" Bascug diin mihatag kini sa iyang mga insights mahitungod sa pagpadagan sa usa ka-unibersidad.
Gihanyag ni Cong. Rep. Plaza ug Dr. Johnvie Goloran sa nahitabong diskusyon ang adbokasiya sa soil science ug ang kalambigitan niini sa edukasyon.
Sentro sa nahimong pagpakighinabi ang mekanismo sa pagpakusog sa edukasyon labina sa kabahin sa research and development.
Mihatag usab sa iyang mga plano ug suhestiyon si Chancellor Ditucalan nga sa iyang panan-aw maoy mga posibleng nindot tutokan ug hatagan pagtagad aron mas mutaas ang kalidad sa edukasyon sa atong nasud.
Nahimo nga mas produktibo ang panagtipok tungod kay nag-abot usab nga nakahinabi ni Agusan del Sur State College of Agriculture and Technology (ASSCAT) President Joy Capistrano ug Commission on Higher Education (CHED) Caraga Regional Director Alma Sy-Patron si Chancellor Ditucalan.
Mipasalig kini sa kanunay nga pag-abli sa MSU-IIT sa pag-giya sa paghimo ug polisiya ug sa paghatag ug tabang labina sa pag-transition sa ASSCAT sa usa ka state university sama sa MSU-IIT.
Miapas usab sa diskusyon si Cong. Rep. Alfel Bascug nga mapasalamaton sa institusyon sa MSU-IIT nga kon asa daghang mga estudyante niini ang gikan sa probinsya labina kadtong mga nahimong iskolar sa Pagtuon program sa Provincial Government of Agusan del Sur.
Ang Mindanao State University-Iligan Institute of Technology (MSU-IIT) ang usa sa prestihiyosong tunghaan nga naghatag ug kalidad nga edukasyon sa nasud ug gali apil kini sa top 1000+ universities worldwide sa Times Higher Education (THE) Impact Rankings sa tuig 2024.
Ang imbitasyon kang Chancellor Dituclan nahitabo tungod kay kini mitambong sa gipahigayon nga budget hearing sa mga State Universities sa nasud para sa tuig 2025. (Team Eddiebong/PIA-Agusan del Sur)
