Barangay information officers sa Dinagat Islands, naghiusa atol sa Prov’l Information Convention 2024
DINAGAT ISLANDS - Nagkadaiyang mga barangay information officer (BIO) gikan sa 100 barangay sa pito ka lungsod sa probinsya sa Dinagat islands ang naimbitahan atol sa gipahigayon nga Provincial Information Convention 2024 pinaagi sa buhatan sa Provincial Information Office (PIO) sa pagpanguna ni Provincial Information Officer Jauzz M. Edera, LPT, ug sa pakig-alayon sa Provincial Disaster Risk Reduction and Management Office (PDRRMO) sa pagpanguna ni PDRRM Officer Rosario Jra. R. Alon, MPA niadtong adlaw sa Biyernes, Setyembre 20, ngadto sa Provincial EOC, Sta. Cruz, San Jose, Dinagat Islands.
Tumong sa maong kalihukan nga matabangan ang mga BIO nga mahatod ang mga angay nga balita ug impormasyon gikan sa pamprobinsya nga level ngadto sa mga katawhan pinaagi sa maayung pagsibya. Aduna kini tema nga "Empowering Barangay Information Officers in Dinagat Islands: A Digital Media Literacy Workshop on Disaster Resilience and Risk Reduction Management" diin nagtumong nga matagaan og saktong kaalam mahitungod sa pagbuhat og mga balita ug materyales nga makatabang pagpahibalo sa komunidad sa mga programa, proyekto ug serbisyo, hilabi na gayud ang mga anunsyo ug alerto sa mga katalagman gamit ang nga makabag-ong teknolohiya.
Tataw nga gipasabot ni PIA-Caraga Assistant Regional Director Renelle L. Escuadro ang mahitungod sa Strengthening Advocacy against Fake News Through Grassroots Communication, lakip ang mahitungod sa Enhanced News Writing, Basic Photography ug Information Officer's Role on Hazard Monitoring and Warning Dissemination ug ang Role of Government Communicator nga gipasabot nila PIII/News Production Head Jimmy S. Jara, Documentation Unit Head Wrights Casiano, Local DRRM Officer II/ Capacity Building and Training Officer Roderich Guinita, ug ni AVEO-III/AO-Designate Amalia A. Fuentes.
Anaa usab sa maong kalihukan ug mihatag og mensahe ang mga municipal information officers (MIO) sa matag munisipyo sama nila MIO-San Jose Jurie S. Mancia, MIO-Dinagat Mhelody Santander, ug MIO-Tubajon Jeffrey C. Crisostomo. (PIO-PDI/PIA-Dinagat Islands)
