Drug informants sa Kitcharao aduna nay ganti
DAKBAYAN SA BUTUAN -- Pinaagi sa Municipal Ordinance No. 125 sa Sangguniang Bayan sa Kitcharao, ning lalawigan, hatagan na og ganti ang mga drug informant sa lungsod pinaagi sa Community Drug Informant Incentive Program.
Ang Community Drug Informant Incentive Program gimugna aron mahatagan og ganti o insentibo ang drug informants nga naghatag og importanteng impormasyon diin mamahimong basihan sa mga otoridad sa pagdakop niadtong mga nagabaligya o nagasuyop og iligal nga droga sa lungsod.
Tumong sa maong ordinansa sa pagpangamahan ni Sangguniang Bayan Member Jeffrey Lex L. Nueva, nga mapanalipdan ang mga residente sa lungsod ilabi na mga kabataan batok iligal nga droga ug mapugngan ang pagkuyanap niini ug angay lamang matod pa nga hatagag reward ang mga drug informant tungod sa sakripisyo nga ilang buhaton aron lamang mahunong na ang droga dili lamang sa lungsod sa Kitcharao apan sa tibook probinsya.
Ang ganti mao ang mosunod: High value target - P20,000; Drug Information Database (IDID) person of interest – P15,000; person of interest in barangay drug clearing process – P10,000; ug high impact operation – P15, 000.
Ang nasangpit nga ordinansa gi-aprobahan sa Sangguniang Panlalawigan sa rekomindasyon sa Committee on Peace and Order and Drug Abuse Prevention and Control sa pagpanguna ni Bokal Dick Victor B. Carmona, kauban sila SB members Erwin L. Dano ug James T. Reserva basi sa Seksyon 22 sa R.A. 9165, “An Act Instituting the Comprehensive Dangerous Drugs Act of 2022.” (JO Mellejor, PLGU-Agusan del Norte/PIA-Agusan del Norte)
