Barangay San Roque, Prosperidad nakadawat ug P700K para sa barangay improvement
PROBINSIYA SA AGUSAN DEL SUR -- Duha ka cheke nga mikantidad og P700,000 ang gidawat ni Punong Barangay Rodrigo Cervantes Chavez sa Barangay San Roque, Prosperidad niadtong Hunyo 21 gikan sa probinsiyal nga panggamhanan sa Agusan del Sur.
Ang usa usab ka cheke nga nagkantidad sa P500,000 alang sa major rehabilitation sa barangay health center tungod guba na kini kaayo ug aron mahatagan og saktong pagtagad ang residente mahitungod sa programa sa panglawas.
Ang laing cheke nga mikantidad sa P200,000 alang sa paghimo og 82 meters nga drainage canal matag kilid sa kalsada gikan sa Purok 1 paingon sa eskwelahan sa elementarya sa maong barangay.
Dako ang kalipay ug pasalamat ni Chavez sa mga opisyales sa probinsiya sa paghatag og pagtagad sa ilang panginahanglan.
“Dako ang pasalamat nako ngadto kang Gov. Santi Cane Jr., Vice Gov. Sammy Tortor, Congressional Representatives Eddiebong Plaza ug Alfel Bascug tungod bisan taod-taod na kini namo nga gipaabot, gihatagan gyud mi ani alang sa among health center ug drainage canal,” matud pa sa punong barangay. (PPIO-Agusan del Sur/PIA-Agusan del Sur)
