Drainage project na-turn over sa San Francisco, Agusan Sur
AGUSAN DEL SUR -- Usa ka mahinungdanong kalihokan ang gipahigayon sa Barangay 2 sa San Francisco, Agusan del Sur sa bag-o lang nga blessing ug turnover ceremony sa 121 linear meters nga drainage canal.
Ang proyekto, usa ka sub-proyekto sa Kapit-Bisig Laban sa Kahirapan (KALAHI) Comprehensive and Integrated Delivery of Social Services - National Community- Driven Development Program (CIDSS NCDDP) Additional Financing (AF) nga programa sa Department of Social Welfare and Development (DSWD), diin nahimong posible pinaagi sa hiniusang paningkamot sa komunidad, barangay local government unit (BLGU)-2, ug LGU - San Francisco.
Ang seremonyas gitambongan sa mga community volunteers, BLGU-2 officials, heads of offices gikan sa nagkalain-laing buhatan sa LGU ug mga representante gikan sa DSWD Caraga.
Ang area coordinator sa KALAHI CIDSSH nga si Afsa Macairing, nipadayag sa iyang kinasingkasing nga pagpasalamat sa paningkamot ni Mayor Grace Carmel Paredes-Bravo.
"Akong dakong pasalamat kay Mayor Paredes-Bravo sa iyang personal nga pagsumite og mga sulat ngadto sa Central Office sa DSWD, aron sa pagsiguro nga ang LGU makadawat sa gikinahanglang suporta alang sa proyekto," sigon ni Macairing.
Ang turnover ceremony nagtimaan sa opisyal nga pagbalhin sa responsibilidad alang sa pagmentinar ug pag-atiman sa drainage canal ngadto sa komunidad sa Barangay 2. Kining simbolikong lihok nagpalig-on sa kamahinungdanon sa pagpanag-iya sa komunidad ug aktibong partisipasyon sa pagpatunhay sa mga benepisyo sa proyekto sa umaabot nga katuigan. (LGU-San Francisco/PIA-Agusan del Sur)
