Agusan Norte nakasungkit ug 59 golds sa Caraga athletic games
DAKBAYAN SA BUTUAN -- Mokabat sa 59 golds, 69 silver ug 57 bronze ang nasungkit sa mga players sa probinsya sa Agusan del Norte sa gihimong Caraga Regional Athletic Games (CRAG) 2024 didto sa Datu Lipus Makapandong Gov. DO Plaza Sports Complex, Prosperidad, Agusan del Sur niadtong Mayo 5-11.
Ang maong sports event ning rehiyon gipartisiparan sa 12 ka probinsya ug syudad sa Caraga Region ug gisalmotan sa 8,000 ka student athletes diin ang mga nidaog maoy mahimong representante sa rehiyon sa Palarong Pambansa karong bulan sa Hulyo sa Cebu City.
Ning tuiga 25 ka sports disciplines ang gisangkaan sa mga atleta sa elementary school graders hangtod senior high school students nga naglangkob sa 12 ka public school divisions sama sa Agusan del Norte, Agusan del Sur, Cabadbaran City, Butuan City, Surigao del Sur, Surigao del Norte, Tandag City, Bislig City, Siargao Islands, Dinagat Islands, Bayugan City, ug Surigao City.
Sa total medal tally, nahimong 3rd placer ang Agusan del Norte nga nakakuha ug 185 ka medals samtang mi-kampyon na usab ang Butuan City athletes ug ang Agusan del Sur ang 2nd placer.
Nagpakitang gilas ang mga atleta sa Agusan del Norte sa mga sports events nga gymnastics, taekwondo, special games ug Wushu ug uban pa.
Ang sports events ning tuiga mao ang table tennis, taekwondo, archery, arnis, gymnastics, badminton, basketball, billiard, boxing, dance sports, football, futsal, penkak silat, sepak takraw, softball, swimming, baseball, volleyball, wushu, chess, athletics, tennis, wrestling, ug special games.
Bisan pa man wala nakuha sa probinsya ang championship, proud ang mga opisyales ug tanang taga Agusan del Norte sa performance sa mga atleta niini ug nanghinaot nga mas mo-dominar pa kini sa sunod nga mga Caraga regional games. (Jay Vincent Demain, PLGU-Agusan del Norte/PIA-Agusan del Norte)
