Mga former rebel sa Agusan Sur miduyog sa gobyerno sa pagmugna sa transformation plan
AGUSAN DEL SUR -- Miduyog ug misuporta ang mga former rebel sa gobyerno alang sa pagmugna sa transformation plan sulod sa lima ka tuig nga implementasyon niini.
Gipasalamatan ni Governor Santiago Cane, Jr. ang presensiya sa mga personahe sa Office of the Presidential Adviser on Peace, Reconciliation, and Unity (OPAPRU) sa pagpanguna ni Undersecretary Wilben Mayor alang sa duha ka adlaw nga Transformation Program Planning Workshop niadtong Abril 3 ug 4 nga gipahigayon sa San Francisco, Agusan del Sur.
“Your presence in our province is indeed very inspiring kasi kung saan pupunta ang OPAPRU, papasok ang development of that particular place and Agusan del Sur is very thankful that you are here,” pamahayag ni Gov. Cane.
Mipasalig ang gobernador nga ubos sa iyahang liderato nga hugot nga makigtambayayong kauban ang mga katawhan sa probinsya sa mga programa nga ipatuman sa maong buhatan.
“We will not be in partnership with OPAPRU for nothing. Buong puso po naming gagawin ang aming parte, Sir. Sana, in your future endeavors, ikonsidera pa rin ninyo kami lalong lalo na po ang mga friends rescued (FRs) natin dito sa Agusan del Sur,” dugang ni Cane.
Gidayeg ni OPAPRU Eastern Mindanao Director Elisa Evangelista-Lapiña ang mga lider sa probinsya diin nagkanayon kini nga swerte ang mga FRs sa Agusan del Sur tungod sa pagpakabana sa mga opisyales niini nga mahatagan sila ug ang ilahang pamilya og maayong kaugmaon.
“On our part, be rest assured Gov nga ang Agusan del Sur tutukan namo as isa ka priority area sa OPAPRU,” pamahayag ni Lapiña.
Gipaabot usab niya ang kamanduan ni President Ferdinand R. Marcos Jr. sa National Task Force to End Local Communist Armed Conflict (NTF-ELCAC) sa hugot nga implementasyon sa amnesty program para sa mga former rebels. (PPIO-AgSur/PIA-Agusan del Sur)
