Commodity investment plan sa Agusan del Norte, aprobado na
DAKBAYAN SA BUTUAN -- Giila ang probinsya sa Agusan del Norte nga abunda sa produktong agrikultura ug pagpangisda rason nga importante ang pagbaton og Provincial Commodity Investment Plan (PCIP) alang sa tuig 2024 hangtud 2026 nga hugtanong gi-aprobahan sa Sangguniang Panlalawigan bag-ohay pa lamang.
Ang PCIP usa ka strategic rolling plan diin gitutukan ang value chain sa matag commodity sa probinsya. Kini nga plano nag silbing blueprint aron matumbok ang mga proyoridad nga programa alang sa pagpalapad sa agrikultura ug pagpangisda sa matag lungsod ug makatabang usab kini aron makalatid og mga saktong lakang alang sa implementasyon niini.
Sa kasamtangan, aduna nay inila nga mga champion commodities ang probinsya sama sa abaca, saging, lubi, kapi, cacao, balanghoy, mangga, bangus, dairy cattle, kanding ug baboy. Sa maong PCIP aduna nay bag-ong commodity ang probinsya, ang kawayan ug lowland vegetables.
Dako ang papel sa maong lakang tungod pinaagi niini mamahimong musaka ang kalamboan sa agrikultura lakip na usab ang ekonomikanhong aspeto ning probinsya.
Kini gipalabang pinaagi sa Sanggunian Resolution No. 611-2023 atol sa ika-65 nga sesyon regular sa SP niadtong Disyembre 5 ning tuig sa pagduso ni bokal Erwin L. Dano, ang tsirman sa komitiba sa Agriculture and Agrarian Reform. (RJSE, PLGU-Agusan del Norte/ PIA-Agusan del Norte)
