P2.9M pondo sa 3 ka ospital sa AgNor, tabang medikal sa kabos
DAKBAYAN SA BUTUAN -- Pagapundohan na usab sa buhatan sa Department of Health - Center for Health Development (DOH-CHD) Caraga ang Medical Assistance for Indigent Patient Program kun MAIPP sa Kitcharao District Hospital (KDH), Cabadbaran District Hospital (CDH), ug Jabonga Municipal Hospital (JMH) human gi-aprobahan sa SP ang Sanggunian Resolution No. 563-2023 nga nag-unod sa paghatag og otoridad kay Governor Ma. Angelica Rosedell M. Amante sa pagpirma sa Memurandum of Agreement (MOA) tali sa DOH-CHD aron kini mapundohan.
Ang gigahin nga kantidad naglangkob sa mosunod: P990,000 para sa KDH, P1,485,000 sa CDH ug P495,000 sa JMH nga mo suma-total sa P2,970,000 diin kini usab subay sa Republic Act No.10924 o sa giilang General Appropriations Act (GAA) fiscal year 2021 nga gibutang sa panudlanan sa DOH - Caraga para sa tulo ka ospital nga gidumalahan sa probinsya isip assistance ngadto sa mga indigent ug poor patients.
Ang maong programa gigama aron padayong mahatag ang libreng serbisyo ug masiguro ang mas epektibo ug episyente nga sistema sa pagpatuman sa medikal nga tabang ngadto sa mga katawhan nga nanginahanglan.
Pagapundohan lamang kini human mapasa sa maong mga hingtungdan ang liquidation reports sa miaging tuig nga gipundo niini sanglit kini subay sa budgeting and auditing rules and regulations.
Isiguro lamang sa maong mga ospital ang availability sa mga tambal, medical supplies ug uban pang health care services.
Ang paghatag otoridad giduso sa pagpangamahan ni bokal Atty. James T. Reserva.(SVDeligero, PLGU-Agusan del Norte/PIA-Caraga)
