Benepisyaryo sa livelihood program, pasado sa pagsukod sa kahimtang sa pagpuyo
DAKBYANA SA BUTUAN -- Nakalabang na sa “means test” o pagsukod sa ang-ang sa kahimtang sa pagpuyo sa 60 ka residente sa Buenavista, Agusan del Norte nga apil sa upat ka grupo nga mopalambo og enterprises ubos sa Sustainable Livelihiood Program nga gipahiluna ni Kongresista Dale B. Corvera kaabag ang Department of Social Welfare and Development (DSWD).
Gihimo na nila kaniadtong Nobyembre 14, ang oryentasyon, ang sunod nga ang-ang sa pagpalambo kanila ug sa ilang organisasyon aron mahimong takus pagdumala ug pagpadagan sa enterpises nga puhonanan sa DSWD og tag P300,000 matag usa.
Tulo sa upat ka enterprises panag-iyahan ug dumalahon unya sa mga mag-uuma ug ang laing usa, sa mga mangigisda.
Kabahin kining upat ka enterprises sa 23 tanan ka enterprises nga ipalambo ubos sa SLP sa tibuok segundo distrito sa Agusan del Norte nga pundohan gamit ang kapin sa P7 milyones nga pundo nga napahiluna ni Kongreista Corvera.
Human ning orientation magpadayon na dayon ang social preparation, apil na ang organizational development, unya ngadto na sa pagplastar sa plano sa negosyo, pagbansay sa pagpadagan ngadto na sa pagpatuman niini. (Hannie Paniamogan, Agusan del Norte 2nd Congressional District Office/PIA Agusan del Norte)
