287 barangay tanod sa Las Nieves, nag-apil ug skills training
LAS NIEVES, Agusan del Norte -- Gibansay ang 287 ka mga Barangay Tanod sa Barangay Peacekeeping Action Teams (BPATs) Training kaniadtong Byernes sa municipal gymnasium sa Las Nieves, Agusan del Norte.
Ang mga partisipante gilangkoban sa mga BPAT members gikan sa tanang barangay sa Las Nieves.
Ang BPATs Training gihimo para mapalawig ang kapas ug kahibalo sa mga BPATs sa pagresponde sa krimen.
Gihisgotan sa training ang balaod sa criminal procedure, ug sa pag-aresto.
Gi tudlo usab sa mga BPAT members ang mga special laws sama sa Republic Act (RA) No. 9344 o Child in Conflict with the Law, ug RA No. 8353 o Anti-Rape Law.
Ang pagpahigayon sa BPATs training gipangunahan sa Las Nieves Municipal Police Station ubos sa pagdumala ni PCPT Charlon M. Montero.
Gitagaan ni PCapt. Montero ug dakong kabug-aton ang papel sa mga BPATs member sa pagmintenar sa kalinaw ug kahapsay sa mga barangay sa lungsod.
“Dako akong pasalamat sa atong mga barangay tanod tungod kay sila ang force multiplier sa atong kapulisan,” pahayag ni Montero.
Ang pagpatuman sa maong training gisuportahan usab sa lokal nga panggamhanan sa Las Nieves ubos sa pagdumala ni Mayor Karen Rosales.
Sa iyang mensahe, gipaabot sa mayor ang iyang pasalamat ug pagdasig sa mga BPAT members.
“Salamat sa inyong pagtambong ug hinaut nga aduna kamoy matun-an ani nga training ug unta makatabang kini sa inyong pagpanerbisyo sa atong katawhan” matud pa ni Mayor Rosales.
Kaabag usab sa kapulisan ang Department of the Interior and Local Government nga girepresentahan ni Myrna B. Libao, ang municipal local government operations officer.
Ang pagbansay sa mga partisipante gipangunahan ni Prosecutor Danny C. Serrano, gikan sa Agusan del Norte Provincial Prosecutor’s Office.
Nagpadayag usab sa ilang pasalamat ang mga partisipante sa maong training tungod sa kaalam ug kapas nga ilang nakuha.
“Nakita gyud nako unsa ka importante kini nga training para sa amo nga mga BPATs ug salamat kang Mayor Karen sa atong mga pulis sa pagpahigayon niini,” pahayag ni Ervin Silao, barangay tanod sa Balungagan. (MLGU PIO, Las Nieves/PIA Agusan del Norte)
