Alagang Tingog Center gisubhan sa Cabadbaran City
CABADBARAN CITY, Agusan del Norte -- Gisubhan na ang Alagang Tingog Center (ATC) sa Cabadbaran City, Agusan del Norte, usa ka facility nga magsilbing partner sa buhatan ni Kongresista Dale B. Corvera sa Cabadbaran City, sa probinsya sa Agusan del Norte ug ubang buhatan sa gobyerno pagpadangat og sosyo-ekonomikanhong mga serbisyo sa probinsya.
Ang ATC magsilbing sentro unya sa serbisyo sa Tingog Party List nga gi-representahan sa kongreso ni Kong. Yeddah Marie K. Romualdez, usa ka Cabadbaranon nga kapikas ni House Speaker Martin Romualdez, sa Cabadabaran City ug sa mga lungsod sa distrito 2 sa Agusan del Norte.
Mismong si Kongresista Romualdez ang mibisita sa Cabadbaran City aron subhan ang ATC nga nahimutang sa B. Milan St. sa Barangay 11 (duol sa main gate sa Carga State University-Cabadbaran Campus).
Ang ATC mopadangat unya ug medical assistance, emergency ug ubang assistance sa mga individual nga naa sa crisis ug uban pang hinabang nga makatabang aron moarang-arang kahimtang sa pagpuyo sa matag usa.
Isip pasiunang serbisyo nagpahiuna ang ATC ug P5,000 cash assistance sa 2,000 ka residente in crisis situation pinaagi sa Department of Social Welfare ang Development (DSWD). Lain pang 1,000 ka residente usab ang nakadawat niini sa lungsod sa RTR.
Ubay-ubay usab nga premyo sa pa-raffle ang gipadangat sa maong okasyon, apil na ang 10 ka refrigerator, 10 ka TV, duha ka motorsiklo ug uban pa.
Kauban ni Kongresista Romualdez sa mga kalihukan sa Cabadbaran sila si Kongresista Corvera, Gob. Ma. Angelica Rosedell M. Amante ug Cabadbaran City Mayor Judy Chin Amante ingon man sila si Mayor Napoleon Montero sa Jabonga ug Mayor Jenrey Montante sa Kitcharao.
Mitambong usab sa maong okasyon si Kongresita Joboy Aquino sa distrito 1 nga sakop ang Butuan City ug Las Nieves, diin gipabarug usab ang laing ATC ug gisubhan usab karon. (JM Cuenca, Agusan del Norte 2nd District congressional District/PIA Agusan del Norte)
