P7.5M nga Kadiwa grant nadawat sa 5 ka CSO sa Caraga
DAKBAYAN SA BUTUAN -- Mokabat P7.5 milyones nga suportang pinansyal sa ilalom sa programang KADIWA grant ang gitugyan sa Department of Agriculture (DA) Caraga sa lima ka civil society organizations (CSO), nga gipahigayon sa DA-Caraga Regional Office sa dakbayan sa Butuan bag-uhay pa lamang.
Gipangunahan ni Regional Executive Director Engr. Ricardo M. Oñate Jr. ang kalihukan kauban sila si Regional Technical Director (RTD) for Operations Rebecca R. Atega ug Agribusiness and Marketing Assistance Division Chief Lynn A. Pareñas.
Sa maong kantidad, P4.625 milyon ang nahiadto sa MSC-Center for the Poor Agricultural Cooperative (CEPAGCO) sa Talacogon, Agusan del Sur aron gamiton sa pagpalit og hauling truck ug capitalization.
Ang ubang benepisyaryo mao ang CanCanMadCarLan Free Farmers Agriculture Cooperative (CCFAC) sa Cantilan Surigao del Sur nga nakadawat sa kantidad nga P969,900, Maticdum Farmers MPC (MAFAMC) sa Tandag City ug P1.1 milyon, La Gracia Farmers Agriculture Coop sa Tubay Agusan Del Norte ug P332,000, ug Jaguimitan MPC sa Nasipit Agusan Del Norte nga nakadawat ug P472,000.
Ang Kadiwa sa DA padayon nga nagahatud ug luwas ug makaya nga presyo nga mga pagkaon sa rehiyon ug nagtabang sa mga mag-uuma nga mahimong direktang mosuplay sa kinahanglang pagkaon sa komunidad.
Gipasabot ni RTD Atega nga sa maong paagi, mawagtang ang daghang ang-ang sa merkado sa ingon mahagatan og higayon ang mga mismong mag-uuma nga mokita og mas-dako. (DA Caraga/PIA Caraga)
