DTI gituki ang tama, insaktong presyo sa pamaliton sa AgSur
ROSARIO, Agusan del Sur -- Mipahigayon og surpresang pagmonitor sa timbangan ug price tags ang Department of Trade and Industry (DTI) Agusan del Sur kauban ang mga miyembro sa Local Price Coordinating Council (LPCC) niadtong Agosto 9, 2023 sa mga tindahan sa public market lungsod sa Rosario, ning probinsya.
Ang DTI-ADS kauban ang mga personahe sa Municipal Treasurers Office (MTO), Municipal Agriculture Office, Municipal Information Office, Municipal Environment and Natural Resources Office, ug Negosyo Center mi isa-isa sa pagsusi sa mga timbangan sa mga tindahan sa gulayan, karnehan, bugasan ug prutasan sulod sa merkado sa lungsod.
Na-obserbahan nga pipila lang kanila ang nagbutang ug price tag gawas sa bugasan. Hingpit nga gipahinumduman sa maong grupo ang kanunay nga pagtuman sa balaod sa price tag pinaagi sa pagbutang sa price list sa ilang mga agricultural products.
Pipila usab ka mga timbangan ang nakitang wala mitunong sa tamang timbang, diin hugot sila nga gipasidad-an nga dili gamiton ang maong timbangan hangtod kini ma susi ug ma calibrate sa MTO.
Ang maong monitoring gihimo sa LPCC Rosario aron nga mas maprotektahan pa ang mga konsumador sa lungsod. (DTI-AgSur/PIA-Agusan del Sur)
