Mag-uuma sa Las Nieves, nakadawat sa fertilizer discount vouchers
Ang matag rice farmer midawat sa kantidad nga P4,000 o mokabat sa suma total nga P808,000 balor sa FDV, ilalum sa Rice Program sa Department of Agriculture (DA) Caraga.
Ang pagpang-apud-apod sa fertilizer discount vouchers usa ka follow-up assistance ngadto sa mga rice farmers nga nakadawat sa mga high breed rice seeds pinasubay gihapon sa programa sa DA.
Ang mga rice farmers nga naka-benepisyo sa programa naggikan sa mga barangay sa Ambacon, E.G. Montilla, Mat-i, Pinana-an, ug Lingayao.
Si Evelyn Menavia nga taga-Mat-i daku ang pasalamat sa pagkadawat niya sa voucher tungod kay maseguro na niya ang pagpalit sa gikinahanglang fetilizers sa iyang humayan.
“Dako na kining tabang sa amoa kay niining higayona kinahanglan na namo ang fertilizers sa among umahan. Mapasalamaton gayud ako sa gobyerno kay maka-discount ako sa abono nga akong paliton,” matud pa ni Menavia.
Laing mag-uuma, si Carmelita Baal nga taga Lingayao mipadayag sa iyang kalipay pagkadawat sa iyang discount voucher.
“Sakto gyud kini alang sa dakung area nga akong gihumayan sa pagka-karon. Mapasalamaton ako sa gobyerno kay mihatag kini og suporta sa mga mag-uuma ilabi na karon panahon sa krisis,” padayag ni Tocende.
Si Nick Tocende usab nga gikan sa Barangay Ambacon nagpasalamat sa DA sa suporta sa abono sa iyang basakan.
“Nanghinaot ako nga magpadayon kini nga programa sa DA aron daghan pang mag-uuma ang matabangan,” padayag ni Tocende.
Nanawagan usab ang Municipal Agriculture Office sa Las Nieves sa mga mag-uuma sa pagseguro sa ilang pagpalista ug pag-update sa ilang ngalan sa RSBSA kon Registry System for Basic Sectors in Agriculture sa DA.
Pinaagi sa RSBSA, daghang mga kaayohan ug suporta ang madawat sa mga mag-uuma gikan sa panggamhanan.
Si Mayor Karen Rosales nagpasalamat sa DA-13 ilabi na kay Regional Executive Director Ricardo OΓ±ate Jr. sa pagtabang sa mga rice farmers sa Las Nieves.
“Ang padayon nato nga pagpakig-lambigit sa DA daku og natabang sa atong mga mag-uuma sa lungsod,” matud pa sa mayor.
Iyang gidugang nga ang pagpakig-tambayayong sa lokal nga panggamhanan ngadto sa DA maoy usa sa mga pamaagi aron mapalambo pa ang sektor sa agrikultura sa Las Nieves.
“Tumong sa atong pagpalambo sa agrikultura mao ang kasegurohan sa pagkaon dili lamang sa atong lungsod apan lakip na sa ubang areas dinhi sa Agusan del Norte,” padayag ni Mayor Rosales. (LGU Las Nieves/PIA Agusan del Norte)
