Mga bangka gimando pintalan ug pula sa Cabadbaran City
Contributed photo
Unod sa City Ordinance No. 2023-001 nga gipangamahan ni Cabadbaran SP member Oliver C. Bulang ang pag obligar sa tana’ng mga nanag-iya og bangka nga 3 gross tons paubos kinahanglan nga marehistro ug pintalan ang unit og kolor pula (red) diin ang background sa code sa bangka dapat kolor puti ug nagsukod og 5 inches samtang ang letra’g numero sa code kolor itom sa sukod nga 3.5 inches. Ang mga pintal nga gamiton sagubangon sa syudad sa una’ng pag ilis sa pintal sa bangka.
Alang sa boat markings/registration, ang mga motorized bangka magsubay sa code nga ADN-(numero gikan sa COA)-M samtang sa mga non-motorized bangka magsunod sa code nga ADN-(numero gikan COA)-NM.
Sa mga tag-iya nga magdumili sa pagsunod sa maong ordinansa multahan og P500 hangtud P1,000 ug posibli’ng pagbawi sa lisensya. Dugang pa, sa mga masakpan nga magtamper sa markings sa ilang bangka masilotan sa kantidad nga P5,000.
Gi-aprobahan ang mao’ng ordinansa pinaagi sa Sanggunian Resolution No. 386-2023 atol sa ika-46 nga sesyon regular adtong Hulyo 11 ning tuig sa pagduso ni Bokal Erwin L. Dano ang tsirman sa komiti sa agriculture and agrarian reform. (PLGU Agusan del Norte/PIA Agusan del Norte)
