Tuesday, 18 July 2023

Mga farm-to-market road sa AgSur, kombenyente sa agrikultura, transportasyon 

PROSPERIDAD, Agusan Del Sur -- Gipahigayon ang Ground Breaking Ceremony sa Concreting of Bucac – Marcelina farm-to-market road (FMR) nga gitambongan ni Regional Director Ricardo Oñate sa Department of Agriculture (DA) Caraga, uban si Governor Santiago Cane Jr., 1st District Representative Alfelito Bascug, ug mga miyembro sa Sangguniang Panlalawigan, Vice Governor Sammy Tortor, ug Bayugan City Mayor Kirk Asis.

Ang concreting sa Bucac-Marcelina FMR nahimong posible pinaagi sa pagpaningkamot sa probinsya nga makakuhag proyekto sa buhatan sa DA Caraga ilawom sa Philippine Rural Development Project (PDRP). 

Kini nga dalan magdugtong sa nahuman nga Marcelina–Mahapag FMR ug San Vicente-Mahapag FMR, diin mahimo kining agihan padulong sa kasamtangan nga crumb rubber processing facility nga gipanag-iyahan sa Farmers Self Reliant Multi-Purpose Cooperative (FASRMCO) sa San Vicente, Prosperidad, diin usa usab kini sila sa mga benipisyaryo sa mga proyekto nga gi-implementa ug gipatuman.

Dugang pa niana, ang Bucac-Marcelina FMR makonektar usab sa national road junction sa Agusan-Davao road sa Barangay Taglatawan, Bayugan City. Usa ka oportunidad sa mga katawhang Agsurnon ilabi sa maong dapit nga moresulta sa dakong pagkunhod sa oras sa pagbiyahe, gasto sa transportasyon, ingon man ang pagpauswag sa produktibidad sa agrikultura sa mga mag-uuma. (Team Eddiebong/JPG/PIA-ADS)